明華： 小南，我等到了，這跡位就係識得著文化部阿腦个「台灣客家建築之精品」个邱姓河南堂忠實第。

小南： 明華，河南堂就在我等學校，中正國中个操場脣口，我好奇蓋久了！多謝你陪我共下來尞。

明華： 嗯！我帶妳去尋導覽員邱阿公，他知得蓋多老屋个故事！

邱阿公： 歡迎你等！探頭看，河南堂个一磚一瓦，像講屋頂个形仔、屋頂項个剪黏、大門口个匾額，還有屋肚个木雕、書法同彩繪，故事盡多哦！你等聽過火燒庄戰役無?

明華： 我知得火燒庄就係屏東長治長興村，該片發生過戰爭哦?

邱阿公： 係哪，當時六堆抗日大總理邱鳳揚，領導當地个客家人奮勇抵抗日本軍，日本軍贏吔同歸庄仔燒核。

小南： 係因為那場戰役，正安到火燒庄个係無?

邱阿公： 喔！這係三種地名由來个其中一種，還有一個講法係，早年移民到臺灣開墾个大部分係細倈仔，出門不時毋記得關火爐，結果發生火燒屋，屋仔燒淨淨。毋過河南堂就係邱鳳揚个倈仔邱元壽起个！佢做生理盡賺錢，1915年開始改建舊屋仔，花了三年正完工哦。

小南： 哇！三年个時間！恁費工哦！

邱阿公： 係呀！這片其實原本有兩間客家四合院，一間已經拆核了，河南堂係在各方人士个努力之下，分屏東縣登錄為歷史建築保存下來，躡尾以鄉土藝術館為名，正對外開放參觀。行~我等開始今晡日个行程啦！

小南： 大門項个匾額，念起來仰會係「河堂南」呢？

邱阿公： 小南，你看著个河南堂係堂號，代表家族个起源，係為著分子孫知啊自家个祖先對哪仔來个，又過同「堂」字放啊在中，係我等臺灣南部六堆客家个特色哦！

小南： 做麼个愛同堂字放在在中呢？

邱阿公： 哦！有人講係為著提醒子孫愛以家庭、以信仰為中心；也有人講係學老人同客家人相拚个時節，客家人為著避免誤傷自家人，故所故意同堂字放在中，同學老人做出區分。

明華： 該邱屋祖先係對河南過來个嗎？

邱阿公： 邱姓个始祖係姜太公呂尚⋯⋯

明華： 係釣魚仔个該儕姜太公喺？

邱阿公： 係哪！歷史項記載姜太公𢯭手周武王打敗商紂過後，武王為著感謝佢封賞齊都營丘分佢，子孫取營丘个丘字來做姓，毋過避諱同孔子共名，就加了邑部正變成「邱姓」。邱家後代在河南發展啊盡好，因為恁仔，姓邱个大體以河南堂來做堂號！

小南： 堂號對一個家族來講，正式意義蓋重大呢！

明華： 哇～屋峨頂有鳳凰、麒麟，蓋鬧熱哦！

邱阿公： 係啊～河南堂大部份个剪黏作品都集中在屋峨項！

小南： 麼个係剪黏呢？

邱阿公： 剪黏係一種傳統建築裝飾个工藝，建築師傅先同各種彩色个陶片裁「剪」成形，再「黏」到塑形个泥灰表面項，做出人物、花、鳥仔這兜各種个型樣！我等共下探頭看門廳左片析廂房項个屋峨啦！

明華： 我看著了，有白馬仔同鳳凰。

邱阿公： 哈哈～明華～該毋係鳳凰，係雞仔正著！詳細看做得尋著三個元素，錦雞、駿馬同玉蘭花。

小南： 我想，這應該係吉祥个意思，著無？

邱阿公： 錦雞个錦取諧音係「金」，同馬字合起來就係金馬。玉蘭花有另外一個名稱係「玉堂春」！

明華： 喔～合起來就係「金馬玉堂」?

邱阿公： 無毋著，這個成語个來源，係漢代个金馬門同玉堂殿，後代用來指翰林院，抑係引申高官爵位个意思。邱家祖先對後代个期望，在這裡肚表現到盡清楚哦！

邱阿公： 我等來看一下河南堂門廳个建築構造！講究个傳統建築，會將屋簷向前延伸做出一道走廊，安到步口廊。為著撐等屋簷加闊過後个重量，步口廊頂項就需要有檐柱來撐等。

明華： 嗯！邱阿公，檐柱項有該燈籠造型个短柱，頂高雕刻到蓋華麗哦！

邱阿公： 若目珠盡好哦！這係「吊筒」，乜安到垂花柱仔，一般會以牡丹、茶花、蓮花抑係白菜來做主題雕刻。門廳前个吊筒，上半部个左片雕刻了牡丹、右片係茶花，下半部个形仔像花盎抑係花籃，頂項嗄雕滿了梅花花紋，有富貴平安个意涵。

小南： 該吊筒兩片，像翼胛形仔个又係麼个呢？

邱阿公： 哦！該係「雀替」！一般在樑同柱仔交接个地方，形成三角形个結構，這有穩定直角同裝飾个功能，做得將屋頂个重量對樑轉移到柱仔項。步口廊這片个雀替，一片雕刻了鳳凰叼牡丹，象徵一品富貴，另外一片就有看著雕刻了宮廟裝飾輒用个題材－四聘，也就係歷史上四個聘請賢才个故事，左側膁係堯聘舜，右側膁就係文王聘子牙。

明華： 有呢有呢！左片柱仔頂个雀替，在中个人物拱手執禮，蓋像在該拜託麼个！

邱阿公： 你等看个無毋著哦，這係「堯聘舜」个故事。在中个人物係堯帝，左片析係在耕田个舜，堯聽講舜个孝心感動天，故所前來禮聘舜𢯭手治理國家。

小南： 恁生趣！木雕乜做得講故事，我等再過去尋看啊還有其他故事無！

小南： 大家探頭看，這獅仔盡威風哦！

邱阿公： 這個木雕係建築師傅用圓體雕个手法做个，特別立體，做得對每一個角度來欣賞。

小南： 做麼个愛雕獅仔呢？

明華： 獅仔係萬獸之王，有獅仔在這掌等，妖魔鬼怪都毋敢入來！

邱阿公： 無毋著，你等看，獅仔採半眠半跍个姿勢，兩粒目珠緊盯等廳堂入口處，隨時等機會，就像鎮守家門个守護神，會有驅邪避凶个作用。再來，我等看這公个獅仔、嫲个獅仔个差別，公獅仔嘴擘擘含等珠仔，嫲个獅仔个嘴就合起來。

明華： 獅仔底下个雕刻乜蓋華麗呢！

邱阿公： 獅子用爪仔捉穩个所在，係負責撐等水平㧡簷个結構，安到「步通」。步通底下這垤雕刻精美个結構安到「步通隨」，做得加強柱仔同樑枋結構个穩定，乜有裝飾个功能哦！

小南： 哇！我發現兩片个步通隨圖案都係花同鳥仔，但係看起來有息把仔無共樣。

邱阿公： 無毋著，左片係鳳凰同牡丹，右片係「綬帶鳥」同山茶花。綬帶鳥个綬字同長壽个壽共音，有祈求長壽个意思。山茶花象徵大地回春，生到蓋鬧蓋靚。這係客家輒常看著个花同鳥仔裝飾組合，這有「春光長壽」个意涵哦！

小南： 邱阿公，我從頭到就緊在看屋簷下這兜得人惜个人物造型裝飾，佢等係麼人呢？

邱阿公： 這條在壁面頂項，偎近屋簷个水平裝飾帶安到「水車堵」，係用交趾陶同剪黏做成个，頂項个故事蓋精采，做得講係歷史細劇場呢！你等揣看哪在中个故事主題係麼个？

明華： 我看著「天水關」三個字，係講三國演義裡背孔明收姜維个故事喺？

邱阿公： 無毋著，明華你係三國迷嗬，你這也看得出來哦！

小南： 邱阿公，你講分我聽啦～我乜想知，係麼个故事啊？

邱阿公： 好好好！你等看哦～拿等黃色扇仔个就係鼎鼎大名个諸葛亮，佢蓋欣賞姜維謀略蓋好，故所用計謀分佢叛變，姜維最後盡服這個諸葛亮，躡尾還變成諸葛亮个接班人呢！

明華： 哇！每一尊人物都蓋有意思哦！

邱阿公： 這兜交趾陶細劇場一般都係忠孝節義个歷史故事，乜係為著鼓勵後代見賢思齊，學習古聖先賢个氣節！

邱阿公： 來來來！我等這下共下入來去門廳看啊！

小南： 哇～這空間有挑高呢！蓋氣派！

邱阿公： 這門廳係人客入到屋肚過後接觸著个第一道空間，裝飾一般都較華麗，看中央這扇用雙層透雕技法雕刻个屏門，修復過後色身亮線，蓋餳人著無？邱家後代還識歸來老屋，用屏門做背景，在這翕結婚个相片哦！

明華： 雕工蓋幼工！我看到獅仔身項背等一個花盎仔。

小南： 我乜看出來了, 阿公你看，另外一扇門這隻係大象嗬！

邱阿公： 你等都講著了，這兩扇門个雕刻主題就係「獅負梅瓶」同「象負菊瓶」。花盎仔在在中，四片脣項各自圍等四儕仙人，合起來就係八仙，象徵安泰祥瑞。

明華： 我有息把仔好奇，做麼个愛用獅仔同大象仔呢？

邱阿公： 因為獅仔同大象仔都係頭擺傳說个神獸，同八仙雕刻組合，有象徵法力無邊、鎮宅避邪个意涵，再來花瓶仔个瓶字同平安个平字共音，代表平安；菊花象徵秋天，梅花代表寒天，整體來講，就係「四季平安」！

小南： 欸～對面壁項有兩個空，蓋像兩隻目珠哦！

明華： 該應該係透氣窗啦！

邱阿公： 無毋著，這兩個對稱个氣窗就安到「鳳眼」，一般會設置在祖堂大門个頂項，就像係祖先兩粒目珠看顧等子孫。毋過，河南堂个鳳眼蓋特別哦，係設置在門廳。客家人祭祀祖先大體係在祖堂，但係邱家比較較特別，平常時將祖先个牌位用紅紙包等收起來，有嫁討儀式抑係祭祀个時節，正將祖先个牌位請出來，設置在門廳祭拜。

邱阿公： 邱鳳揚家族在火燒庄戰役中，領導客家族群抗日還並開始出頭，躡尾正遷徙到這下个田寮來落腳。厥倈仔邱元壽做生理蓋成功，係地方上重要个人士，故所正有能力起出恁登真、恁靚个河南堂！欸～我等來去看鎮宅之寶啦！

小南： 邱阿公～這就係一扇門啊！寶貝在哪仔呢？

邱阿公： 哦～這扇門斯無恁簡單又搭盡貴哦！你等看著下背个「裙板」係對廣東請來畫師到現場畫个哦！

小南： 畫裡背看起來有一位老阿公同三隻羊仔，代表麼个意思呢？

邱阿公： 喔！這係用水墨畫个，代表「守節」，係蘇武牧羊个故事」。

明華： 欸～左片頂項个角頭有字呢！「庚午年仲夏之月 茶陽邱金鑾作」。

邱阿公： 算起來這隻年代大約係昭和5年，也就係1930年畫好个作品，後背該句話就說明了，畫師係對潮州府大埔縣茶陽鎮來个。根據邱家後代回憶，當時節起屋仔个經費假使講用這下土地个價值來換算，大概係愛賣十甲个土地恁多，正有辦法起得成个哦！

小南： 我就知河南堂斷真就係當時節有口人个大屋仔啊！

邱阿公： 這下保留下來个河南堂係二堂二橫个合院結構，我等共下行到中央个天井，較看得清楚建築个格局。

明華： 二堂指个就係門廳同祖堂嗎？

邱阿公： 無毋著，我等面對門廳同建築共一個座向，後背該一進就係祖堂。

明華： 該「二橫」係指麼个呢？

邱阿公： 想像一下哦，河南堂个格局，有像中文个「四」這隻字，左右最外圍个部分安到橫屋，門廳同祖堂由兩條廊道連接，安到「過水廊」。

小南： 喔～故所我等今嘎企在中央天井，就係在四合院中軸線个位跡！

邱阿公： 小南反應蓋遽哦！客家人講究个倫理次序觀念，乜會反映在建築格局項，你等做得觀察一下祖堂个屋峨定著係最高个，左右相連个廂房，屋峨个高度會漸漸仔降低。

小南： 你等看門廳个屋簷項，該有花蕊造型个東西係麼个？

明華： 左右兩片析各有一個，我揣這應該係用來排水个嗬！

邱阿公： 係哪，佢等有一個得人惜个名稱安到吐水，落雨个時節天井个簷口該雨水對這位排出，接等對天井地面項个排水口緩緩仔流出到排水系統，再排到屋外背。風水觀念水會聚財，故所木匠師傅運用巧思分排水道有兜仔彎斡，又做得分天井毋會積水，分水會排出搭並守核財庫。

邱阿公： 你等有看著兩側膁過水廊个竹節窗無？

明華小南： 有啊！

邱阿公： 窗門頂項个裝飾安到「窗額」，造型蓋像展開來个書冊，係用泥塑技法塑形再彩繪成个。來來來！搶答一下！窗額頂項寫个字，來源係麼个詩詞啊？一片係「好鳥枝頭」！

明華： 我知！係「李太白醉酒」，「好鳥枝頭亦朋友⋯⋯」

邱阿公： 另外一片係「落花水面」！

小南： 我知！「落花水面皆文章」！

邱阿公： 嘿嘿嘿～你等答著囉！對詩詞个意境中，你等應該感受得著建築師傅想表現快樂滿足个心境嗬！

小南： 故所書冊在中个細劇場正有人在釣魚仔搞尞！

邱阿公： 哈哈～這係「姜太公釣魚仔」个故事哦，係用交趾陶做成个。

明華： 你等看「好鳥」兩個字頂項有旗仔同球仔

小南： 著呢！毋過「枝頭」兩個字頂項係麼个，我就看毋出來了！

邱阿公： 該係一種安做「戟」个兵器，上頭䌈等安做「磬」个樂器，揣看哪這兜組合起來代表麼个吉祥意涵啊？

明華： 蓋簡單啊～取諧音就係「祈求吉慶」个意思！

邱阿公： 答著哩！

邱阿公： 大約對中國明朝中期後，開始出現用書法藝術裝飾建築物个做法，毋單淨做得增加空間中風雅个文化氣氛，還較有教化後代子孫，搭並展示這屋仔主人心性个功能。

明華： 河南堂个書法裝飾乜不會少呢~

邱阿公： 係呀！匾額同對聯以外，門同窗仔个地方乜有用洗石仔工法做成个書法裝飾，祖堂門外背呢係書法作品个集中地，我等共下來去看，佢等實在盡精彩哦！

小南： 我會念！祖堂門楣項這個匾額寫个係「忠..實..第」，無毋著嗬！

邱阿公： 無毋著！欣賞一下這個楷書書法字體，非常个飽滿莊重哦。

小南： 名仔安到「忠實第」有麼个意涵呢？

邱阿公： 忠實第係邱姓祖堂堂號个其中之一，聽講係邱姓先人在宋朝个時節，因為忠勇保衛國家，得著皇帝御賜忠實兩隻字，意思係「忠誠篤實」。後世用這個做堂號，係希望子孫都會嚴守祖訓，乜象徵一種榮耀啦。

明華： 你等看！祖堂入口兩側膁乜有刻書法字呢！

邱阿公： 這安到楹聯，係篆書字體，楹聯四片析个牆壁，同窗仔頂項乜刻滿了書法字，做得體會著邱家祖先對後代子孫深遠个期望。

邱阿公： 我等這下來到祖堂，這係客家宅院最神聖个地方，係分後代慎終追遠个空間。為著突顯佢个重要性，位跡一般都會座落在中軸線項，搭並設計成最高个樣貌。

小南： 壁項个畫像係麼人啊？

邱阿公： 係邱元壽个畫像，日本時代邱元壽同倈仔邱求順經營製糖事業，累積了財富，1915年將舊屋仔改建，就係你等這下看著个河南堂忠實第。

明華： 因為中正國中愛擴大校地，拆核了部分建築，毋過我等還係做得想像當時節个規模有幾大吔！

小南： 明華你探頭看，頂項个橫樑有盡多枝哦！

邱阿公： 在中國潮州地區个建築，習慣在屋峨正中央个橫樑下背再多放一枝橫樑，安到子孫桁。這枝橫樑，同另外一條較低个「燈樑」都定著愛突出到隔壁个間房，這安到出丁，係財丁興旺、富貴雙全个象徵。

明華： 我揣邱屋祖先乜係對潮州地區來个，故所乜用相同个形式起河南堂啦！

邱阿公： 講著哩，你等看，頂高項那枝畫了彩繪同先天八卦圖个就係子孫桁，有鎮宅个意象。壁面項「棟對」个起頭文字會對準子孫桁，係用來掛姓名燈同添丁燈个燈樑，下背乜會有「燈對」。棟對同燈對个文化，這係南部客家建築个特色哦！

小南： 棟對講个就係壁項紅底烏字个對聯著無？

邱阿公： 著！棟對一般會紀錄家族祖籍源流抑係遷徙个過程。上聯係講，祖先渡海來台灣，開山打林開創家業辛苦萬分。下聯「靈心耿耿望栽成」，期望後代子孫做得有光明个前途！蓋特別个係，客家个祖堂一般擺祖先牌位，毋過呢，河南堂係用來祭拜神明哦！

邱阿公： 這窗門項个裝飾，乜安到窗額！我等來看祖堂右側膁廂房个窗門，造型非常个講究。

小南： 這係雕刻出來个哦？色身蓋靚呢～書卷个造型十分立體！

邱阿公： 這主要係用泥塑技法，塑形後再來彩繪。在中个黃花，用剪黏个方式一片一片黏上去，做工蓋幼，故所特別像真个哦！

明華： 這面項个書法字我看得識呢！係鳶飛魚躍！

邱阿公： 明華你盡厲害哦，連篆體都看得識！

小南： 書卷窗額頂項个窗仔，看起來蓋厲害！

邱阿公： 這窗仔用了十個「壽字磚」組合起來个，有長壽个意涵呢！

明華： 詳細看正發現河南堂个窗門，造型正式蓋多樣貌哦！下背藍色窗門又係另一種！

邱阿公： 這種安到直櫺窗，窗櫺个數量隱藏玄機哦，你等共下來算看啊！

明華小南： 一，二、三⋯⋯

小南： 有九個窗櫺。

邱阿公： 正確。奇數代表陽，偶數代表陰，故所陽宅个窗櫺數量定著係奇數，這千萬做毋得搞差哦！

邱阿公： 你等看著了無？河南堂个兩道過水廊，同這屋仔劃出三個天井，在中个天井在祖堂頭前，係比較嚴肅个空間。左右兩片个天井就係屋下休閒个空間，氣氛較輕鬆，我等這下來去右片析看看啊。

小南： 邱阿公，這個花台蓋特別緊致！

邱阿公： 喔！這最早其實係一座噴水池！邱家後代講過，水池頭擺有假山仔造景，還有裝飾手拿釣梹个牧童同牛仔，水池裡肚有畜魚仔，細人仔下課最好走來撈魚仔！噴水池乜代表水會聚財个風水觀念哦！

明華： 你等看頂高～蓋生趣~魚池肚無魚仔，屋峨頂嗄有三隻金魚！

邱阿公： 該係之前紹介過个剪黏！建築師傅个巧手分魚仔看起來都蓋像在看我等呢！金魚分你等聯想著麼个吉祥个意思啊？

小南： 年年有魚！

邱阿公： 蓋好～明華呢？

明華： 金魚係「金玉」个諧音，我想著「金玉滿堂」！

邱阿公： 無毋著，河南堂總共有九隻金魚个剪黏，分佈在無共樣个屋峨項，你等做得詳細慢慢仔尋哦。

邱阿公： 你等這下看著个壁面安到「山壁」。有看著頂項圓形彩球个圖案無？嘎你等知有麼个意思無？

小南： 我知～同過水廊个窗額共樣，有旗仔、彩球、兵器戟、樂器磬，代表「祈求吉慶」！

邱阿公： 嘿嘿嘿～小南答著了！

小南： 毋過下背蓋像䌈了一支扇仔？

邱阿公： 該係芭蕉扇，做得同災禍、不吉祥个全部撥走！河南堂个屋頂還隱藏五行風水个概念哦！好！我等再行來去後背看看哪！

邱阿公： 對這個角度做得一下仔就看著祖堂、廂房个屋峨！有看出麼个無？

明華： 我發現祖堂个屋峨最高，再過來高度就跈等變低，又合三個屋峨个形式都無共樣！

邱阿公： 明華看出來了哦！屋峨兩側膁收尾个部分安到「馬背」，照五行个概念，會有「金形圓、木形直、水形曲、火形銳、土形方」五種對應个造型。

小南： 該河南堂有幾多種馬背呢？

邱阿公： 你等看祖堂个馬背有兩個銳角，係火形馬背。廂房个馬背盡直，係木形馬背！

明華： 廂房脣口个橫屋，馬背分人个感覺有息把仔彎彎，該係水形馬背喺？

邱阿公： 係哪！我這下公布答案，河南堂个馬背，就係木水火這三種！

小南： 哇！河南堂建築一哪仔都係故事，每一個裝飾細節，蓋像都充滿祝福同期許。

明華： 最厲害个係書法裝飾，放在打眼个跡位仔，每日提醒子孫家族共同个歷史同「家訓」。

邱阿公： 河南堂這棟歷史建築，經過保存修復過後分佢新个生命，毋單淨係傳統歷史文化个傳承同見證，乜說明了文化資產保存个重要性。歡迎你等下二擺再來參觀，分我等共下認識客家文化同建築之美！